Oct 11, 2011

شهادتي على احداث المنطقة الشمالية

يوم 9 اكتوبر في حدود الساعة 8 بليل وصلني اخبار ان المتظاهرين ادام ماسبيرو بيتم قتلهم ودهسهم ووصلي خبر ان الناس في اسكندرية نزلت ادام المنطقة الشمالية وضمت على مسيرة من المكتبة للاخوة الاقباط والاعداد كانت تفوق ال4000 الاف متظاهر ادام المنطقة الشمالية وانا في الطريق للمنطقة في شارع المشير شمينا ريحة دخان (حاجة محروقة) وناس بتجري في كذا اتجاه المهم الناس كانت متعجبة في ايه وسالنا وعرفنا ان البلطجية بيهجمو من شوارع جانبية .

بالظبط مكملناش ربع ساعة وفجاءة لقينا هجوم من 30-50 واحد من ناحية شارع المشير ومعاهم ازايز وطوب حاولنا نرد ملقيناش حاجة ندافع بيها عن نفسنا حرينا في اتجاهم بالعصيان طلعو يجرو وتقهقرو ووصلنا لخط الترام وهناك عرفنا نلم طوب ونحدفه ووصلناهم لاول شارع المشير ده غير الناس اللي دخلت شوارع جانبية عشان تحاصرهم وتضمن انهم مش حيلفو علينا ويعملو كماشة لحد كده وكنا مسيطرين على الوضع -- معلومة اول ظهور للبلطجية كان من ناحية المستشفى بتاعت القوات المسلحة اللي ادام المنطقة الشمالية وبعد كده تاني ظهور كان من شارع المشير .

فضلنا على الحال ده ميكملش 10 دقايق او ربع ساعة المهم لقينا الناس ورانا بتقل بسرعة والجيش بدا يسلح نفسه بعتاد الامن المركزي حاولت اعرف الناس بتروح فين اكتشفت ان في دعوات جت من الاشتراكيين الثوريين - وجزء من الاقباط  اللي كانو في المسيرة ان احنا نمشي ونطلع للمكتبة المهم رجعت للصفوف الاولى كانت المناوشات شغالة لسة بس البلطجية اتفرقو وبقيو مجموعات صغيرة بس العدد في الصفوف الاولى لا يتعدى 400 وبالتالي خفنا من ان الجيش يهجم علينا من ورا ويتعمل علينا كماشة بعد ما ظهرنا بقا مكشوف رجعنا شارع المشير كله جري ووقفنا ادام الجيش وبرضك كان رافض يتدخل ويمنع البلطجية من الضرب  .

البلطجية تقدمو واخدو شارع المشير كله لحد المنطقة الشمالية ووصلو لخط الترام واستخدمو الطوب اللي عنده وفعلا اجبرونا على التراجع خاصة النشطاء نشرو حالة ذعر وسطنا وخوفونا وده كله بعد ما شقو الصف وكشفو ضهرنا للجيش لول ستر ربنا واضطرينا نجري لحد البحر عند اول شارع المشير وقررنا نعمل جبهة ونصد البلطجية وفعلا خليناهم يرجعو ادام المنطقة وثبتنا في مكانا بس كان وقتها العدد بالكتير 100 واحد وكل ده وبتوع كفاية حيقولو عليكم بلطجية لسة شغالين في اسطوانتهم المشروخة خاصة انهم بيقولو يلا على المكتبة وناس كتير اعترضت على موضوع وفكرة المكتبة خاصة ان ملهاش قيمة ولا ليها اي فايدة وكانو عاوزين يعتصمو ادام المنطقة الشمالية .

وفعلا ابتدينا نجري ونعدي البحر وعديناه وقتها البلطجية كانت وصلت للبحر ولسة معدتش للكورنيش وخبطو على العربيات وكسرو ازاز شوية عربيات وعلى كده انتهت الاشتباكات والمتبقى مننا طلع مسيرة للمكتبة وعند المكتبة الساعة 2 بليل البلطجية هجمت هجوم مصغر بس عرفو الاخوة الاقباط يصدوه .

في وسط انسحابنا في ناس اتزنقت في نص شارع المشير بين البلطجية ومجموعات من البلطجية ناحية سيدي جابر ومعرفتش تطلع منهم صديق ليا اسمه احمد طلعت بيؤكد ان البلطجية اللي هجمو على اهالي الشهدا يوم 22 يونيو هما نفسهم اللي هجمو علينا اللي هما اساسا من محل "حلواني الصعيدي" وكانت هتافاتهم عنصرية وطائفية بدرجة قوية جدا وكان معاهم شوم وسيوف وفعلا اصابو احمد طلعت في رجله بس الحمدلله طلع سليم وجت على خير.

ده كانت شهادتي على احداث المنطقة الشمالية و اللي شفته اكان من الاخوة اللي شقو الصف او اللي ثبتو وقررو يدافعو عن المسيرة وعدم ترك البلطجية الوصول ليها.

في النهاية احب اقول رحم الله شهداء مصر ودعوة للصيام تضامنا مع اخواتنا الاقباط وعاش كفاح الشعب المسلح ويسقط يسقط حكم العسكر واحب انشر صورة اخدتها من ادام المنطقة الشمالية عشان الاخوة اللي بيقولو فتنة طائفية.



انا مش عاوز اطول عليكم بس لازم تشوفو الفيديوهات ده :


-----


-----


-----

لو جربتو تجيبو فيديوهات الاسرى في حرب اكتوبر حتلاقو الجيش بيعاملهم احسن من شعبه والجيش اللي يقتل شعبه يبقى جيش "خاين"

-----



ونقولها تاني حق الشهدا بتوع اول ثورة مش حننساه وحق شهدا ما بعد التنحي مش حننساه ودم اخواتنا ادام ماسبيرو مش حننساه وحنجيبه ومن عين الجيش الخاين  , " نحن لا نهزم .. نموت او ... ننتصر" ده شعارنا وده اللي مدام فينا دم بيجري حنعمله .


Sep 25, 2011

نص شهادة المشير طنطاوي


س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟
  
ج1 : الاجتماع كان برئاسة رئيس الوزراء واعتقد أننه بلغ

---------------------------------


س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس ؟

---------------------------------



س3: ما الذي أبداه رئيس الجمهورية في هذه اللقاءءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات  القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

---------------------------------




س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين بما فيها استخدام الاسلحة الخرطوش والنارية من 25 يناير حتي 28 يناير ؟

ج4 : ليس لدي معلومات عن هذا واعتقد ان هذا لم يحدث

---------------------------------



س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟ 

ج5 : ليس لدي معلومات

---------------------------------




س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

---------------------------------



س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات

---------------------------------



س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي

---------------------------------



س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

 ج9 : إنا معرفش ايه اللي حصل

---------------------------------



س10 : هل تستطيع سيادتك تحديد هل كانت هناك عناصر أخري تدخلت ؟

ج10 : هيا معلومات غير مؤكدة بس اعتقد ان هناك عناصر تدخلت

---------------------------------



س12 : هل ورد لمعلومات سيادتك ان هناك عناصر اجنبية قد تدخلت ؟

ج12 : ليس لدي معلومات مؤكدة ولكن ده احتمال موجود

---------------------------------



س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه

---------------------------------



س14 : ولمن يصدر رئيس الجمهورية علي وجه العموم هذه الأوامر ؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

---------------------------------



س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

---------------------------------



س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

---------------------------------



س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟ 

ج17: يسأل في ذلك مساعديه الذين ابلغوه هل هو علي علم أم لا

---------------------------------



س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

---------------------------------



س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

ج19 : هذه مسئولية جهات التحقيق

---------------------------------



س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات و لكن التظاهر وفضه هي خطة وتدريب موجود في وزارة الداخلية

---------------------------------



س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك ؟

ج 21 : معنديش علم بذلك

---------------------------------



س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس المتظاهرين...هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

---------------------------------



س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

---------------------------------



س24 : هل هناك اصابات أو وفيات لضباط الجيش ؟

ج 24 : نعم هناك شهداء

---------------------------------



س25 : هل تعاون وزير الداخلية مع القوات المسلحة لتأمين المظاهرات ؟

ج 25 : لأ

---------------------------------



س26 : هل أبلغت بفقد ذخائر خاصة بالقوات المسلحة؟

ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

---------------------------------



س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

---------------------------------



س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟ 

ج28: لا ..لم يتم القاء القبض على أى أحد

---------------------------------



س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟

ج29 : لم يحدث

---------------------------------


س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

---------------------------------

مع العلم ان هذه كانت اسئلة الدفاع عن المتهمين وليست اسئلة دفاع اهالي الشهداء ... وعندما حاول المدعين بالحق العام ومحامين اهالي الشهدا سؤاله اعتدى احدى حراس طنطاوي على احدهم والمصدر 

و

---------------------------------

وبعد ما اتضح ان المشير افاق ومنافق وكداب وبيشهد زور هو ومجلسه مظنش ان ثورتنا خلصت مدام حكمهم 
وحكم جيشهم مازال سيف على رقابتا ورقاب الثوار والشعب المصري لذلك .... وجب اسقاط حكم العسكر وباي وسيلة كانت عاشت الثورة المصرية

Aug 26, 2011

البيان التاسيسي للمؤتمر الشعبي المحلي دائم الأنعقاد لمحافظة الإسكندريه





ماهو المؤتمر الشعبي المحلي؟
المؤتمر الشعبي المحلي لمحافظة الإسكندريه هو تنظيم شعبي أفقي ، لاحزبي، يهدف لتكريس سلطة الشعب على المستوى المحلي لمحافظة الإسكندرية، وتفعيل الرقابة والإرادة الشعبيتين على أجهزة الإدارة المحلية بالمحافظه، وتكريس مبدأ الأداره المحليه.
 
أهداف المؤتمر:
 تفعيل الدور الرسمي لأجهزة الإدارة المحلية في تقديم الخدمات المحلية التي تمس الجماهير مباشرة.
 تكريس مفهوم المشاركة الشعبية في الحكم.
 وضع آلية للعمل الشعبي لتجاوز العوائق البيروقراطية في الإدارة المحلية.
 إستغلال الإرادة الشعبية لمقاومة الفساد في الإدارة المحلية وتدعيم اتخاذ القرار محليا.
 وضع قاعدة شعبية تؤهل الشارع لانتخاب رؤساء أحياء ومجالس أحياء ومحافظ ومجلس محافظة منتخبين شعبيا وغير معينين مركزيا.

آليات عمل المؤتمر:
 إنتخاب لجان شعبية لمراقبة عمل مؤسسات الإدارة المحلية وتفعيل الضغط الشعبي الذي يضمن قيامها بمهامها الرسمية المكلفة بها .
 تقديم الدعم الشعبي للأجهزة المحلية في مواجهة الأدارة المركزية بما يضمن قيامها بتقديم الخدمات الشعبية المكلفة بها.
 إنتخاب لجان شعبية لتقديم الدعم لموظفي الأجهزة المحلية أثناء قيامهم بمهامهم الرقابية الرسمية (الرقابة على المخابز ،المباني، إشغالات الطرق ..... إلخ ).

من يحق لهم الأنضمام للمؤتمر؟
كل مواطن مصري حسن السمعة والسلوك مقيم في الإسكندرية، ويبلغ السن الرسمي للأنتخاب والترشيح ويؤمن بأهداف ومبادىء المؤتمر، ويحق لأي مواطن مصري الأنضمام للمؤتمر بصفة مراقب لو لم يكن من المقيمين بالمحافظه.

فئات لا يحق لها الأنضمام للمؤتمر:
أعضاء الحزب الوطني المنحل حتى خمس سنوات سابقه.
 أعضاء مجلسي الشعب والشورى والمجالس المحليه حتى دورتين سابقتين.
 من تولوا أي مناصب وزارية في حكومات تحت ولاية الرئيس المخلوع.

------------------------------------------------------------------------------------

من وجهة نظري ان المؤتمر هو عبارة عن تبلور للي حصل في يوم 28 وهو سلطة الشعب على الشارع بحيث يكون الشعب هو صاحب الكلمة الاولى والاخيرة  في القرار يعني الهدف من المؤتمر ده اننا نقول للشارع ونبهه لدوره الرقابي اللي فقده خلال سنين من حكم مستبد سلطوي مركزي قائم على تعيين اشخاص من قرايب النظام وليسو ذوي كفاءات والمصيبة الاكبر ان ليس للشعب راي فيهم بحيث اصبح الشعب مفروض عليه ارادة مجموعة من الطغاة المستبدين عشان كفاية هجص من ده بدات المبادرة ده وصراحة لسة الحكم عليها صعب وقتيا لكن في الايام القليلة حتضح رؤية متكاملة عن هذا المؤتمر لما ينزل الشارع لكن كانطباع اولي مرحب جدا بكل ما يرجع للشعب سلطته ...... معلومة مهمة : يوم الاحد الساعة 10 ونص في قهوة وادي النيل الملاصقة للشهر العقاري بالمنشية - الدعوة عامة ومرحب بالجميع  ياريت الناس تشارك 
------------------------------------------------------------------------------------

Aug 19, 2011

وقال الشرفاء للمجلس ..... نعم !!!

يوم ما تنحى حسني وبعد عنف من الجيش وموقف معادي للثوار خلال 18 يوم في التحرير خرج علينا الفنجري بتعظيم سلام لارواح الشهداء وقبلهم تعظيم لانجازات حسني وماقدمه للوطن وطبعا انا شخصيا مفهمتش ليه تم تقديم انجازات حسني على دم الشهداء اللي ماتو نتيجة انجازاته على مدى 30 سنة لكن الصورة ابتدت تضح مع مرور الايام شيئا فشيئا


لما سبنا التحرير بناء على رغبة "ائتلاف شباب الثورة" ولا هما ائتلاف ولا هما شباب ثورة اصلا الجيش حل البرلمان و اوقف العمل بالدستور ناس كتير شافوها بداية التنضيف لوضع اساس جديد - انا شخصيا شفتها دك متاريس لافساح الطريق للعسكر عن طريق الغاء كل ما يمط لمشاركة الشعب في السلطة مع المجلس - وبالفعل تم حل البرلمان وايقاف الدستور وكان بمثابة كلمة حق يراد بها باطل حيث ان البرلمان حزب وطني والمجلس عاوز يعمل الصح ويرضي الشعب بشرط انه يساعد على ترسيخ سلطته  المهم دارت الايام وتم بالفعل نقل معركة الثورة على الساحة السياسية وساحة اتخاذ القرار من قبل الجيش حيث كان فيها منافس و حكم ومشجع وكل دول في شخص واحد الا وهو "المجلس العسكري" معرفش هل يجب علي ان اقول الاعظم ولا المبجل بما انه اصبح من المختارين ولا يجب انتقادهم - يمكن يمت لآل البيت ومكنش واخد بالي - وقال المجلس انه منفتح على الحوار بجميع الاطراف و انه حيرسخ مبادئ دولة القانون والعدل والمساواة والديموقراطية والحرية وان جميع مطالب الشعب مشروعة


المشكلة مش في الوعود اللي تم تكسيرها المشكلة في كمية البذل الرهيب من طاقة ومجهود وانتاج سيناريوهات لتدمير الثورة عن طريق الاستعانة بالخارج او بالداخل يعني مثلا الجيش وسلبيته من الصراع الطائفي لمحاولة خلق حرب اهلية او صدام بين طرفين يجعل للجيش ذريعة انه يتهم الثورة بانها خربت البلد وادت لخروج الاسلاميين - اللي الجيش طلعهم من السجون وعطاهم تعويضات ب50 مليون جنيه - بس الموضوع نام وفشل انه ياخد اكبر من حجمه


جتلنا بعد الفتنة الطائفية العملية الامنية وانتشر ذعر قوي بين الناس وتم التهويل والتكبير لحد ما الناس بطلت تخرج من البيت وبالفعل ارتد السحر على الساحر والبروصة لبست اخضر وبما ان المستثمرين  - برتبة لواءات وعقداء - اضايقو قرروا يفكسو لان واضح خسايره مش مضمونه وبحرها واسع


عدت الانفلات الامني خرجت ذريعة العجلة وهي اظن بحد ما اخدت حجم كبير جدا وده ادى لانتشار حالة من الذعر في انحاء المعمورة واكاد ان اجزم انه كان حيتسبب في خروج قوي للشعب ضد المجلس بحيث ان الشعب ترجمه على انه مش خطا الثورة لكنه خطا من جعل من نفسه "عنترة" وقالك احنا حنمسك البلد وهو لا مسك البلد ولا هو "عنترة" وبالفعل وبين يوم وليلة لقينا البيانات اللي بتقول البلد حتولع ومن نفس الابواق وخلال 24 ساعة بتقول مصر متماسكة والحالة مظبوطة ومفيش خوف على الاقتصاد المصري


وبعد الانفلات الحشد الاعلامي للناس اللي ضد الثورة عن طريق دس ان الثوار حيدمرو مصالحهم الشخصية وانهم ضد الشعب وحيدمرو الجيش اللي هو حامي مصالحهم امت يؤدي لصدام بين الناس وبعضها زي معركة العباسية لما تم تاجير بلطجية واصحاب محلات من مناطق محيطة ودس افكار معادية للثوار قبلها بفترة مما ادى لمعركة كان الجمهور في المجلس وكلاب الشرطة العسكرية


وبعد ده طلع سيناريو بالتعاون مع الخارج الا وهو اسرائيل حتدخل سينا ..... وده بدا بانهم زجو بشخصية ايلان الا وهو شاب اسرائيلي عادي - اي شاب اسرائيلي هو مجند في الجيش بتاعهم يعني كل الهجص انهم قبضو على واحد لقطة كلام فاضي - وتم استقصاد وضع صوره في ميدان التحرير لضرب الثورة في رمز ليها مش اكتر بجد حاجة تنفخ البطن ولا الكنافة بالمنجا وبعد موضوع ايلان  خرج علينا الاخوة والاعلام المصري وسط تعتيم مقصود ان اسرائيل تعتدي على الجنود وعلى الارض وتخترق الاجواء وعاملة تقصف وتولع ومش عارف ايه المهم تم ترسيخ فكرة ان اسرائيل داخلة سينا وانهم بيضربو الجيش المصري الباسل اللي اصلا تعداده في المنطقة "ج" في سينا اللي هي المنطقة الحدودية 1100 جندي المهم طبعا الكل قال ازاي اسرائيل تضرب وتعمل وتسوي وتقتل وكان الوضع ده جديد او اول مرة تحصل وكان ال50 عسكري مصري ماتو على ايام حسني مكانوش بشر او كان حيوانات ماتت بدون ما نحس بيهم او على اساس ان غرفة التنسيق بين وزارتي الدفاع المخضرمتين الاسرائيلية والتابعة لها او خادمتها المصرية كان بتبيع جوافة قطاعي - طبعا حيطلع واحد يقولي واش عرفك اقوله افتح معاهدة كامب ديفيد وشوف بند ان مصر تستاذن وتسنق مع اسرائيل قبل ما يدخلها رجل جندي مصري - فطبعا موضوع ان المجلس حيرد وحياخد قرار او انه يعيني بيواجه اسرائيل وحيدا وهو الناصر الوحيد هي تجسيد بسيط لفكرة الهاء الثورة لكن بخطة التدخل الخارجي حيث ننسى ان المجلس ده متواطا ويريد السيطرة على الحكم بحجة اننا بنواجه عدو وهمي ... اه اسرائيل مش عدو واللي حيقولي عدو حديله بالخشبة على راسه يمكن يفوق ... عارفين ليه عشان مصر في حياتها مفيهاش تنسيق عسكري وتجاري وامني وسياحي على مستوى عالي الا مع اسرائيل حتى اكتر من امريكا يعني هما اخوات وايد واحدة ولكن يتم الترويج لسلعة العدو مقابل شراء   ...سكوت الشعب ... من قصيره اللي يقول المجلس ملطوط في مشكلة مع اسرائيل ويقولك هو الوحيد اللي يقدر يقفق ضد المجلس قوله "خلي المجلس يلغي كامب ديفيد" وبلاش كلام كتير


بعد كل الجهد المبذول ده تعالو نشوف على النقيض الاخر الجيش عمل ايه لصالح الثورة زي التحريض على الثوار مثلا وسجنهم واتهامهم بالعمالة  ........... لو حد لقى حاجة ياريت يكتبها في الكومنتات لحسن انا مش لاقي




بعد كل ده مقدرش اقول للملجس العسكري غير انه مجلس خونة وجب اعدامهم وليس فقط اسقاطهم - محوشتش 20  الف جنيه على فكرة -   واذا مكناش حنعدمه عشان خان الثورة فكفاية اعدمه عشان حاكم 12 الف مصري مدني بدون وجه حق وبظلم مجحف وعشان حق الشهداء وعشان ضحايا كشوفات العذرية وعشان علي ماهر وعشان  شهيد العباسية ضحية التحريض  رامي فخري ضحية استهتار ظباط الجيش في اداء مهنتهم ولا معاقبة العمال على انهم بيطلبو حقوقهم ولا عشان الشعب عاوز تغيير ولا عشان  9 ابريل ولا عشان رصيد المجلس اللي ظهر بعد 9 مارس ولا عشان ايه انا مبقتش عارف اعد الجمايل والله


نشوف حاجة صغيرة كده 




كيف انتقل الوضع من هذا



لهذا 


ومن شرف التحية لشهداء الثوار لتحية لقتلتهم


وكل هذا لم يمر على الشعب مرور الكرام لان الشعب صاحي ومش بياكل من الخرى ده 




في النهاية الثورة مستمرة ومتقدة كالجمر وان كنا نشهد فترة هدوء نسبي مليئة بحركة عمالية قوية  تدل على قدوم طوفان شعبي  


تنويه : هذه التدوينة هي ضد المجلس العسكري وطعن في شرفه وشرف الحربية المصرية مالم تتحول الى حماية الشعب وايضا كل ما اتى في هذه التدوينة هي ضد حكم العسكر مضمونا وشكلا وهي تحريض للشعب ضد المجلس العسكري ودعوة لاسقاطه ومحاكمة اعضائه بالخيانة العظمى واعدامهم 




المجد للشهداء .. عاشت الثورة .. يسقط حكم العسكر

Jul 23, 2011

Evronia's World!: الجمعة 22 يوليو: موقعة سيدي جابر

Evronia's World!: الجمعة 22 يوليو: موقعة سيدي جابر: "أولا: الي المجلس العسكري... الشعب خط احمر انا مش قادرة احكي.. انا تعبانة ومنهكة جسديا ونفسيا...وحكيت حاجات كتير على تويتر عندي.. بس ناس كت..."

Jul 4, 2011

ام المجالس !!!


المجلس العسكري ايوة ام المجالس كلها يعني ام مجلس الوزراء وام المجالس المحلية وام مجلس القضاء والمجلس الاعلى للشرطة والمجلس الاعلى للصحافة والمجلس الاعلى للمرأة والمجلس الاعلى للاثار والمجلس الاعلى  للثقافة وام مصر كلها كمان

اه طبعا .... المجلس من يوم ما مسك وانجازاته تضاهي في نصاعها وبياضها وعظمها ما قدمته هذه المجالس اللي بقالها فوق ال7 سنين وفيها اللي قفل 10 سنين كمان يعني مثلا لو قررنا نعد الجمايل ونشوف المجلس وانجازاته اكيد اكيد حنقدر نقف عند حدنا ونعرف ان تكملة الثورة  قلة ادب وسفالة امال ايه المجلس من يوم ما مسك وهو حلف يمين انه مع الثورة وبيحمي الثوار وثورتهم السلمية ان حد يفهمني ازاي سلمية بعد ما استشهد 1000 واحد واتجرح 15الف واحد ..... ما علينا غلطة كده زي غلطة ممدوح شاهين وهو بيقول احمدو ربنا ان جيشكم مش زي جيش ليبيا وكان شاهين كان ادامه خيار الضرب ومعنى كلامه ده ان الجيش لم يختار خيار او طماطم الضرب اكان ده قبل التنحي او بعده 

مثلا ده كده قبل التنحي  يوم 28


وده نتيجة الضرب يوم 28 :)


وده


وده



وده


 وده



وده


وده


ودبابة محروقة بمولتوف


---------------------------------------------

وده بعد التنحي  بس المرة ده زي ما قال اسناعيل عتمان "القوات المسلحة مش مسلحة" وقال في نفس السياق "وقواتكم لم ولن تستخدم القوة ضد هذا لشعب العظيم" نشوف بس كده يمكن اللي اضربو كانو متحرضين من عم ايلان جاسوس الفيسبوك



وكان ده نتيجة يوم 9 ابريل بعد ما الجيش ضرب النار 



وده




وده




وده
-----------------------------------------

 ما علينا مش عاوز اطول وازيد المهم  ده كان اول الانجازات الا وهو حماية الثوار نيجي لحماية الثورة طبعا انا مش حقول عن كشوفات العذرية او اعتقالات النشطاء والمدونين وقمع الصحافة والحرية ومنع الاعتصامات والمظاهرات  ومحاكمات العسكرية لاي حد بيتظاهر عشان 200 جنيه وحماية افراد الشرطة وجبروتهم ومحاولة اعادة اليد الطولى للشرطة وقلة ادبهم وتشويه الثورة وووو

مش عاوز انسى اللي كنت بقوله والاهم ده اللي عمله الجيش للثورة والثوار نيجي بقا لوعد الجيش بتنفيذ مطالب الشعب وشرعيته التي ارتضى لها المجلس نيجي نشوف انجازات المجلس العظيمة

 لاول مرة محاكمة قتلة مترقيين ويتم عمل تعظيم سلام لهم
تطهير مؤسسات الدولة بوضع اشخاص من نفس النظام ولكن بشهرة اقل
تجزئة المطالب وتفتيتها والالتفاف عليها
تعيين محافظين -اذا جت على التعيين في المرحلة ده ماشي- وسبحان الله 13 لواء جيش و3 امن دولة و2 حزب وطني
حد ادنى للاجور على شريحة من القطاع العام -مش كله ومش القطاع الخاص كمان- وهو 700 جنيه وبقى 684 جنيه
الاول مرة قانون يصدر عشان  يختص في فساد الجيش و "قواديه" اسف قياداته حتى بعد خدمتهم
استفتاء يتم فيه خيانة ارادة الشعب 
اعلام يتم فيه ترقيه من يستطيع وضع كلمة "بلطجية" مع كلمة "ثورة" في جملة مفيدة لتشويه الثورة
ايحاء للشعب "المفخد" في بيتهم ان الميدان حيدمر الاقتصاد وان مصر لازم تداين بسبب الميدان 
ايحاء ان الشرطة جريحة ومش قادرة تضرب وتخش شوارعنا عشان بلطجية الثورة
وغيرها كتيررررر

طيب دلوقتي اذا لم يكن المجلس بينفذ اوامر الثورة يبقى هو عدو الثورة - زي ما قالو اذا لم يكن امير للمؤمنين فهو امير المشركين - اقول للمجلس صباح الفل وانا  شايف شخصيا الحسنة الوحيدة لحسني انه طلع المستخبي وحطه في وش الشعب...كتر خيره

عامة في النهاية اقدر اقول للمجلس .... دولة الظلم ساعة يا مجلس قلل انما انتو مش حتكملو 12 دقيقة