الشرطة العسكرية تعتقل طالبين وتحيلهم للمحاكمة العسكرية

نقلا عن المحامي والحقوقي احمد ممدوح : تم اعتقال طالبين من الثانوية العامة على يد الشرطة العسكرية بالاسكندرية نتيجة 
اعتراضهم على تاخر ورق الامتحان وتمت احالتهم الى القضاء العسكري وقد تم الحصول على اسم طالب وهو امجد المصري


وجاري جلب التفاصيل

قالك ده شهيد...ده بلطجي ياثورة

ده بلطجي.....مش ثورجي

اللي في الصورة ده قتله ظابط شرطة اثناء الخدمة لانه حاول التعدي على الشرطي بسلاح ابيض امت الظابط قاله اقف مكانك الناس اتلمت وقالو انت يابلطجي ازاي تيجي تتهجم على ظابط امت الناس اتهجمت على البلطجي وحاولت توقع السكنية وفجاءة البلطجي حاول يجرح الناس وما كان من الظابط ابو مسدس غير انه يرديه قتيلا .... والناس صقفت للظابط وحيوه واخد وسام الشجاعة. صح

لا مش صح ده نموذج من الاعلام الموجه اللي عايشينه ايام الثورة وبعد ما الشرطة اتضربت وده يبين مدى تردي وضع ووساخة الاعلام - داخلية - الوزراء - مجلس عسكري اللي في اعتقادهم هيكلة جهاز هي وضع خطة لنفاق الشعب على اساس انهم اوصياء علينا او على اساس يفهمونا ان الشرطة اتاذت لما اتهجمنا عليها واتكسرت هيبتها واحنا السبب؟!؟!!!؟!!؟

ده اللي حصل لصاحب الصورة ده

-----------------------------------

انما البت البلطجية ده فهي كانت ماشية جنب القسم عشان تقتحمه

-----------------------------------

انما الواد الصايع ده كان بيجهز فتيل مولتوف عشان يحرق بيه القسم

-----------------------------------

المهم بقا فكرة ثورة الشباب السلمية و حكاية بلطجية حرق الاقسام والحرق المنظم للاقسام ووووو كلها اساطير من محض خيال طنطاوي ومجلس القلل بتوعه ونسى اهم اسطورة واقواهم وهي نزول الشعب كله يوم 28 بدون  ما يبقى في نت او اي وسيلة لحشد عدد زي كده ولو القيادة فيها شوية عقل كانت تعرف ان حرق القسم له تفسير احسن شوية : على مدى 50 سنة والقسم بيساوي للفلاح والعمال والمواطن العاطل والبلطجي والفقير رمز قهر لا يمكن نسيانه وبالتالي من ظلم جهاز الشرطة المتفشي لما الشعب شم نفسه ولع في الاقسام .... صعبة على الفهم ده؟؟؟

وعشان نتاكد ونفكركم ثورتنا كانت سلمية لحد 25-26-27 انما يوم 28 مات 1000 واحد واتصاب 12000الف ولا حرب غزة يبقى منين سلمية؟ ولا هي اي اسطورة لكي تثبت ان الشعب وثورته اللي ليها صوت وقوة وقدرة على هدم الفساد هي محض "بلطجة" يعني من الاخر المجلس بيقولوكم : يبني انت وهو عاوزين تنزلو انزلو وانتو ساكتين ولما الشرطة تضرب اكانت المدنية او العسكرية اعدو قولو سلمية سلمية ومحدش له حق الدفاع عن النفس الا اللي لابس ميري فهمتو؟؟؟

حنقولها تاني للمجلس اتقي شر الشعب لانه على اخره واحمد ربنا الثورة الاولى خلصت على خير وحكمنا العقل والنخبة واتركبت بحمد الله من طوب الارض كله ومش بعيد يبقى اسمها "انقلاب 25 يناير" لان برضك احنا مش قلل لسة الحمدلله اللي بيفهمو مماتوش ربنا قرر يسيب شوية يمكن يعرفو يعملو حاجة ويفهمو حقيقة المجلس للناس 

حقيقة المجلس لما نزل وامر الجيش بالنزول الجيش ضرب والناس وقفت وحرقوله مدرعات وبعد كده الجيش سلم الراية مؤقتا وكررها يوم 9 ابريل وكانت بداية معركة الثورة مع المجلس والدليل على كلامي الفيديو ده اللي محدش طلعه لحد دلوقتي والمجلس عامل نفسه عبيط في الزفة

-----------------------------------

  

الشعب مش اهبل واحنا مش عبط والمجلس واضح انه مش فاهم الموضوع ماشي ازاي مع شعب متعشم في مجلس مبارك خيرا هو الفكرة ان الشعب صابر والناس اعتصمت عشان حقها مش عشان حاجة تانية امت المجلس ضربها ببساطة عاوز الناس تعد كام اعتصام حصل من يوم ما مسك الجيش والنهاردة بقيو كام اعتصام "بقيو لا حصر لهم" والبركة في المجلس... الصراحة يا مجلس منظرك وحش واتمنى تكون قريت التدوينة ده شخصيا يمكن تفهم وتتنحى قبل ما الشعب يزورك ويجيبك بايده وابقى خلي ممدوح شاهين باسلوب كلامه اللي عامل زي ميسرة ينفعك او قصة عتمان او حتى جبهة التهييس الشعبية 

ده ثورة عشان الحق والمظلوم.....وحتفضل مكملة لحد ما الشعب ياخد حقه    

افهمو ... دين ابوكو ايه؟

النهاردة ادام المحكمة الساعة 10ونص بالظبط واقفين مستنين "حكم على الظباط القتلة" ولو ان انا مش عارف مستنين ايه بعد ثبوت انهم قتلة المفروض نقتلهم.... المهم عدى علينا اب شهيد واعد يبص علينا واحنا بنهتف فرحان بينا وعينه متقطعة بين الاسى والفرحة ان في حد واقف يسانده وشايل حمل انه يزعق ويقول حقي كفاية الزمن والبلد عليه !! ولا ايه

الاب ده عدى على شوية واقفين بيختلفو في الدستور والانتخابات والاستفتاء وعصام شرف حلو ولا وحش .... المهم قررت اتابع بعيني وانا واقف وسط الزحمة لقيته بيشوح بحرقه في وشهم والناس اتلمت .... طلعت اشوف سمعته بيقول "افهمو افهمو ابني مات عشان الثورة مش عشان برلمان ولا انتخابات ابني مات عشان الحقوق ترجع لصحابها وكان بيقولها والدموع نازلة ببطء" الناس هدته واخدته على جنب وفضلت واقف افكر شوية واخدت بعضي ومشيت ووصلني خبر الظباط اتخلى سبيلهم 4 شهور واتاجلت القضية الصراحة معنديش ولا ذرة شك واحدة ان ده كان حيحصل عشان عارف : ان 

القضاء فاسد

المجلس فاسد 

الطب الشرعي فاسد

 النيابة العامة فاسدة

الداخلية فاسدة 

المشير فاسد 

جهاز الكسب غير المشروع فاسد

المحليات فاسدة 

اعلام فاسد

ومحدش يقولي اصل انا كنت مفكر ان الثورة قامت وكل ده اتغير؟ اتغير ازاي؟ هي عصا ساحر الثورة؟ ولو هي كانت كده وقع ليه من الاول 1000 شهيد والالاف الجرحى؟ وبذمتكو كنتو مفكرين الجيش حيرجع حقكم ؟ مش كان بالاولى يرجع حق بلد من 30 سنة ويتحرك ضد واحد اغتصب مصر 30 سنة مرة فردي ومرة جماعي ومرة يتحرش بيها من يمين ومن شمال ومن كل حتة ... اه الناس اللي مضايقة من التحرش بمناسبة اليوم العالمي للتحرش عارفين المراة "المراة اللي بتعمل نفسها ضحية واقلية متضهدة" اللي هي معمولها اليوم ده مصر امنا كلنا اخدت لقب اكبر ضحية تحرش في تاريخ الكون  عشان مفيهاش راجل وقف يدافع عنها لا وهو لابس عسكري ولا مدني ولما نزلو الرجالة مات 1000 شهيد واتجرح اكتر من 10الاف مصاب وبرضك مفيش راجل لابس زي عسكري قرر يقف يجيب حقنا اللهم 40 ظابط حبهم وحماسهم اخدهم غير كده خلصو الرجالة اما المجلس يطلع ممثل يتعالج على حابه ويطرد مصابين الثورة من المستشفيات العسكرية يبقى مفيش امل في المجلس كحامي للثورة

اما الاخوان يتخلو عن المجتمع ويقولولك البرلمان اولا وسبحان الله فاشخينا بانرات احترم نفسك متعاكسش متمشيش مع واحدة وسكتو عن انتهاك عذرية 17 بنت ولما اتسجنو وطلعو قالو احنا ضد اي سجين سياسي ويافرحتي نسيو ال15الف سجين عسكري وعملو نفسهم عمي ومحبي للمجلس وكان طنطاوي هو الملاك المختار او المهدي المنتظر لتحرير مصر كانو في الاخوان من ارادة الشعب لما اغتصبها المجلس وقالك 60 مادة ولا واحدة فيهم تشبه الاستفتاء؟ فين الاخوان من اللي بهدل الشعب وضيع حقه؟ ولا هما الحق عندهم يساوي مصلحة الجماعة؟....يبقى مفيش امل لان الاخوان يعدلو مصر

اما النخبة الجميلة الحلوة اصحاب الاحزاب والحركات والائتلافات اللي نسيو الشهداء والمصابين يجو يبيعو كل ده ويقولك الدستور اولا على اي اساس منك له ؟ على اساس ايه الدستور اولا ؟ على اساس اللي نزل ودفع حياته وعينه وايده ورجله قالك انا عاملك توكيل بدستور اولا ؟ ولا انا مسمعتش الهتافات  انا فكرتها "عيش - حرية - عدالة اجتماعية" مش "دستور اولا " الا حد يقولي حنكتب دستور على ايه؟ بمناسبة الثورة المجيدة؟ هي في الثورة حد يقولي الثورة ومكاسبها تيجو نعدها؟

1000قتيل

اكتر من 10الاف مصاب

اكتر من 10الاف سجين عسكري

عاطف عبيد براءة

حسني والمجلس معززه

التطهير والعملية وسخت اكتر بعد ما كل حاجة الجيش جاب فيها لواء فاسد

قرار بان الجيش يختص بفساده وكان ناقص يقول على نفسه انا سرقت

فض اعتصامات بالقوة

فض تظاهرات بالقوة 

سجناء راي

سجناء اتسجنو عشان 100 جنيه زيادة

حي الله الثورة وركيبة الثورة حي الله كفاح المنافقين اللي ضيعو حقنا من اصغر حزب لاوسخ ائتلاف حي الله المجلس حامي الثورة والبيادة التي يلعقا الوصوليين حي الله المجلس وتركه اموالنا لتهرب حي الله مجلس الوزراء لكفاحه عشان العجلة تتنفخ حي الله القضاء العادل وعبد السلام جمعه حي الله حزب الكنبة حي الله اللي فرط في دمنا واخواتنا اللي ماتو.....يبقى مفيش امل في النخبة يعدلو مصر

فين الثوار موجودين وبيعانو كل يوم وبيطفحو الدم والخرى وسط شوية اغبيا دمرو الثورة بجدل الاستفتاء من اول من اقترحه لحد اخر من صوت فيه .... انا معرفش بس انا الوحيد اللي هنا ندمان على اني صوت في استفتاء تدمير ثورة 25 يناير ولو رجع بيا الزمن مش حروح استفتي

الثورة مخلصتش ولا عمرها حتخلص لكن يوم فوق ويوم تحت .... الحقو انقذو الثورة قبل ما ولادنا يدعو علينا .... الحقو ما تبقى من كرامة المصريين في دماء شهدائهم .... الحقو البلد من عسكر مبارك ..... الحقو مصر 

اي جزء من جملة "الثورة اولا" لم يفهمه النخبة او الاخوان ---- صعبة قوي نركن جني الغنائم على جنب ---- اي جزء من جملة "انصاف الثورات قبور للثوار" صعبة؟ ---- اي جزء من فكرة ان الثورات 3 مراحل :الثورة ثم دستور ثم انتخابات ---- ايه ممكن نبعته للناس تاني عشان تفهم لو جمعتو ام التوقيعات والاخوان عازو الانتخابات الجيش حيعمل زي ما هو عاوز ليه مصرين تدخلو معركة الحكم فيها طرف في النزاع 

 كفاية مشي ورا النخبة والتيارات السياسة البلد للشعب والراي للشعب كانو فين من زمان كلهم كانو فين الاخوان انزلو التحرير اللي موجود ومستنينا من اكتر من 100 سنة

""اتق الأحمق أن تصحبه إنما الأحمق كالثوب الخلق كلما رقعت منه جانبا صفقته الريح وهنا فانخرق""

 

لف وارجع تاني

وصلنا لفين؟؟ هي سؤال بيطرحه كل مصري دلوقتي سواء كان مؤيد اوضد الثورة وهو سؤال بسيط عن مدى التخبط الثوري اللي وصلناله اولا حبدا بتحليل باسباب ضعف الكيان الثوري وبعد كده حكمل تحليل.

من يوم 25 يناير والثورة نزلت تقول (عيش-حرية-عدالة اجتماعية) واقصى شخصية كان مرجو اسقاطها هي حبيب العادلي بذاته فقط مش حسني مبارك ولو فهم المجلس الاعلى ازاي اندلعت الثورة (اللي اسبابها مازالت قائمة بل ازدادت) حيفهم انه لا مفر من ارادة الشعب لما نزلنا في اسكندرية كنا 25 في 3 مناطق بيهتفو بالكرامة والحرية والعيش والعدالة (مكنش في هتاف ضد حسني مباشرة)  وتم حشد صغير جدا على المظاهرات وبالفعل الناس استجابت (ماعدا انصار حزب الكنبة + انصار "انا مالي منا في حالي") ونزلنا وهتفنا ولما اصطدمنا بالامن المركزي (اللي رجع تاني) حصل اننا ضربناه وفتحنا الطريق للمظاهرات وتم بالفعل تصعيد الهتافات "الشعب يريد اسقاط النظام" يعني من الاخر الثورة مش ثورة فيس بوك ولا تويتر ولا عيال سيس لا ده ثورة ناس عاشت 30 سنة ذل وقهر وحرمان من خير بلدهم وحصلت الثورة وجه يوم 29 يناير (وفي نظري اليوم ده كان اهم من يوم 28) وهو كان حيغير سكة الثورة ب180 درجة ليه ؟ لان ببساطة كان ممكن ائتلاف شباب الثورة يعمل وقتها مجلس وزراء من 5 وزراء لكنه قرر يحط الثورة في خانة رد الفعل وليس الفاعل وهو ما انتهجته الثورة من بعد يوم 28 وطبعا كلامي ده مش تخوين ولا تشويه لطرف لا ده تقييم وانتقاد بسيط المهم وعدت الايام وكان ادامنا  شهر يناير كله للتصعيد لكن الائتلاف قرر انه يحصر الثورة في الميدان وده اللي استغله احمد شفيق وتم ضرب الثورة يوم معركة الجمل وكادت ان يتم تهميشها اعلاميا بقوة وجعلها مظاهرات لولا ان في اطراف في الثورة دعت لعصيان مدني واعتصامات في كل مصر وحصل بوادر انقسام في الجيش وكل ده ادى لسقوط حسني مبارك ومن هنا فقدت الثورة زمام المبادرة بعد سقوط مبارك الى يومنا هذا واصبح المجلس الاعلى منعزل عن الشباب وقرر عزلهم وتقييد الحرية والاعلام واعادة الدولة البوليسية تحت سلطة العسكر.

ده ملخص كمقدمة لاحداث الثورة الى الان والاستنتاج منه في خانة سلبيات الثورة هي :

1- ائتلافات الثورة اللي بتتحدث ضمنيا باسم الثورة وتشويهها لسمعة الثورة

2- صنفنا نفسنا في خانة رد الفعل.

3- لم نعين وزارة في وقت كان الاجماع الشعبي والسلطة للشعب متاصلة في الشارع .

4- لم يتم وضع وثيقة كدستور مبسط يدعم الحريات ويحفظ الحقوق وينظم عمل المرحلة الانتقالية اقصد داخل الميدان.

5- سعي تيارات لتهدئة الثورة واخمادها في سبيل سرعة الوصول للانتخابات والاستئثار بالدستور .

6- عدم وضع خطوات او اليات تاتي الحكومة الانتقالية عشان تشتغل بيها بدل حالة الميوعة والالتفاف على الشعب والمطالب.

7- والاهم ترك الميدان واختزال الثورة في شخص بعينه وهو حسني ورجالته .

اعتقد ده اهم اخطاء وقعت الثورة  فيها وكل ده ادى لتضائل المد الثوري في الشارع وانحصاره في معظم الاحيان والحلول المطلوبة سهلة ومتاحة جدا زي :

1- اول حل واهم واحد فيهم النزول للتحرير لانه هو ده مجلس الشعب بتاع الثورة .

2- وضع صيغة للمطالب بحيث تضمن تشكيل مجلس رئاسي مدني او حتى مجلس شعب مؤقت من اشخاص مرشحين من التحرير والمحافظات وقيادات العمال والفلاحين والمراة والشباب وتضع صلاحيات التشريع والاقرار في ايد المجلس وجلساته علنية واسناد له اختصاصات الرئيس الجمهورية .

3- وضع لجنة تاسيسية لوضع دستور جديد او لو تم الاختلاف عليه وضع لجنة تاسيسية لثوابت دستور جديد .

4- وضع وثيقة او ميثاق حقوقي ويتم تشريعه ولا يتم المساس به .

5- استقلال القضاء والطب الشرعي والنيابة العامة.

6- حل المجلس الاعلى للشرطة والجيش واعادة انتخابهم بعد تطهيرهم على ايد اشخاص مختارين من داخل المؤسسات مع وضع لجان رقابة مدنية على كل اجهزة الدولة .

7- تشكيل لجنة لاقرار العدالة الاجتماعية ووضع خطة للعدالة الاجتماعية .

8- حل المجلس الاعلى للاعلام والصحافة واتحادات النقابات واسناد اختصاصاتها لاشخاص معينين من المجلس الشعبي او الرئاسي وتشكيل لجان مدنية لمراقبة واقرار التطهير.

9- اقالة كل الوزراء ورئيس الوزراء بعد فشله في اقرار مبادئ الثورة .

10- وضع قانون يمنع كل من اخد منصب شرطي او عسكري او حزب وطني ان يمنع من انتخابات البرلمان .

11- الغاء لجنة الاحزاب واطلاق حرية الاحزاب حرفيا.

- واخيرا نصيحة للائتلاف "العمل الثوري يختلف عن العمل الاجتماعي لانه محتاج راي قوي وفعل مش صفحة فيس وشجب وادانة".

- كل ده طبعا سلبيات الثورة وحلولها وفي السطور اللي جاية حقيم المجلس العسكري ونشوف على انهي سكة مودينا....

من يوم ما مسك المجلس الاعلى وهو كان محط تسال وخلاف بين اراء الناس لكن الشهادة لله الغلابة كانو مؤيدين بقوة وبشغف للمجلس الاعلى (وده طبعا عن خلفيتهم لما جه عبد الناصر واقر عدالة اجتماعية صورية وان كانت زائفة وفاسدة) المهم قالو نديه فرصة ونشوف المجلس حيعمل ايه (وطبعا ماكلش معاهم كلام العجلة ولا البسكلتة) لان العجلة واقفة في مصر عند 40% من الشعب وكل هليلة الاعلام ماهي الا اصوات متعالية للراسماليين وحزب الكنبة وكلهم في دائرة مفرغة لان محدش بياكل من كلام العجل والانتاج الا الطبقة ده وللاسف مازال غباء مخاطبة الشعب على انه خرفان (وهو مؤشر بهجة بالنسبة ليا لان الثورة جت من التهميش والاستخفاف والقمع) وال3 صفات دول متوفرين في المجلس وبرتم اعلى من رتم حسني بنفسه وده مؤشر مش حلو مش عشان الشعب لا عشان المجلس اللي قرر يفتح قناة جديدة ويحجب الحريات على النت والصحافة واي حاجة تنفع قبلها كلمة ثورة اكانت ثورة في الجامعات او الاعلام او الشرطة او الجيش نفسه (مع انها سلمية) او حتى ثورة عمالية لابسط الحقوق.

المهم عندي بقا في ده كله ان المجلس عاد للقمع بقوة وسقط قناع العفة عن المجلس وانصاره وحصل استقطاب في الشارع المصري ما انذر بوجود تيار ثوري متقد وتيار نظام فاسد واحداهما يفقد ثقة المجتمع اسرع من سقوط كرة الثلج حيث خان كل ما وعد به من حرية ومراعاة العمال والفلاحين والعدالة الاجتماعية وهيكلة "مؤسسة النفاق المصري" (الاعلام) واقرار الدولة المدنية ويوم عن يوم الناس بتفقد الامل في حاجتين ثورة 25 يناير "السلمية" ووعود المجلس الاعلى وهو ما اتحدث عنه واختصره بكام كلمة "المرحلة الثانية من الثورة" واي دارس تاريخ يعرف ان الثورات مراحل ويعرف ان اللي بيدخل الكتب ودائما التحول لصالح ارادة الشعب ولو بعد حين.....

راعيت في الكتابة نسيان تاريخ كل الاطراف وقراءة لمستقبل الثورة بنائا على الافعال الحالية لكل الاطراف سواء اكانت الثورة او المجلس الاعلى. 

الدليل الوجيز لاقتصاد البهريز!!

المدونة ده انا بكتبها من غلبي بصراحة وبقا عدوي الاول سمير “غضبان” لانه واضح انه خريج معهد “سكلم” لا اكثر ولا اقل اما يطلع يقترض من البنك الدولي 3.5 مليار دولار يعني نضرب ده في الفايدة 1.5% يعني تقريبا 6 مليار دولار يعني قيمة 35مليار جنيه طيب يعني الحكومة مزنوقة في 3 مليار دولار مش يبقى عندها شوية فهم وخطة للمرحلة المقبلة وتضرب عصفورين بحجر يعني تبدا تطبيق العدالة الاجتماعية وتغني نفسها عن انها تشحت ملاليم من برة طبعا حتيجو تقولو ازاي؟

ازاي : واحدة واحدة

اولا- لما يبقى عندنا الدعم للحيتان ومصانعهم اللي بتوزع على العمال ملاليم 200 جنيه وهما بيكسبو مليارات كل سنة مش يبقى غلط وقصدي هنا الغاء دعم الطاقة للمصانع واللي بيوصل تقريبا ل34 مليار جنيه يعني لو الحكومة وقعت بشخطة قلم على القرار ده يبقى خلصنا واحد حيقولي صعبة حقوله ماشي

ثانيا- تعديل اسعار الغاز واللي حتوفرلنا بتاع 18 مليار دولار يعني 106 مليار جنيه مصري صافي الربحية ولا تلغي دعم ولا بطيخ ولا تشحت حتقولي صعبة ماشي

ثالثا- الحد الادنى والاعلى للاجور وده لو بقى الحد الادني 1200 (حتقولي من فيننننن؟) حقولك نحط معاه حد اعلى واللي بياخد بالملايين شهريا ياخد 10الاف جنيه وبالتالي حنوفر 180 مليار جنيه حتقولي صعبة حقولك…. برضو ماشي

رابعا- وده اسهل حل لو الحكومة مش عاوزة تعمل اصلاح محوري وعاوزة تاخد فلوس وتصرف وخلاص وناوية تعد زي قلتها لا امن ولا انجازات ولا حتى بطيخ ان اجمالي الودائع في البنوك المصرية بلغ تريليون جنيه اه (يعني 1000 مليار جنيه) ده جوة مصر وارصدة البنوك المصرية في الخارج 5 مليار جنيه ممكن الحكومة تستلف اللي عاوزاه بسقف ائتماني عاليييييييييييي وتسدد براحتها ولا شروط تعجيزية ولا بطيخ

اخيرا احب اقولكم اني طالب علوم ومليش في الاقتصاد ولا فتحت مراجع اقتصادية اللهم نقصت  3 درجات في الرياضيات انما سمير رضوان بقا الله يجحمه دارس وفاهم بس بيحب يفخد وده ..واضح في حكومة شرف + ربهم الاعلى مجلس القلل

حاجة تخلي الواحد يغلي وينزل عريان في الشارع … حكومة لم تصل لسن المراهقة