الخبر اللي فوق ده اكبر دليل على ان الاخوان والسلف كانوا مفكرين ان الدستور بتاع 71 حيخليهم يدخلوا البرلمان باكترية خاصة ان قانون تنظيم الاحزاب لن يعدل قريبا "ده على فكرهم" المهم فكانت ذريعتهم انهم حيشيلوا المادة التانية من الدستوري "معرفش مين قال كده" لكن عموما لو كنا قلنا لا مكنش برضو اتشالت لكن الوضع الراهن بيحكم ان المادة ده لازم زي ما بتحفظ حقنا كمسلمين تحفظ حقوق الاقليات هما مش مصريين؟؟!!
ما علينا في ظل فرحة الاخوة الاعداء والسلف بغزوة الصناديق "الموباركاة" اتظرفوا اول خازوق فكلمة نعم لم تحفظ كيان المادة التانية العنصري "اللي محسسني لو اتمست يبقى حرفنا القران" وهي نفس الكلمة التي شربوها للمواطن الغلبان وقالوله الحق مصر حتبقى "كافرة" ومش عارف من امتى الاعتراف بحقوق الاقليات كان كفر يا جدعان المهم من هنا لهنا الاخوان اتحطوا قدام موقف صعب جدا وده باين على منتدياتهم ومش عاوز اقول "يمكرون والله خير الماكرين" واللهم لا شماتة يعني لكن ارجع واقول للاخ يعقوب "بتاع البلد بلدنا" لا يا شيخ "ومعرفش مين نصبك شيخ علينا" لا البلد بلدنا كلنا مش انت ولا السلف ولا الاخوة الاعداء بلد المسيحي قبل ما تبقى بلد المسلم وان كنا اكترية فده لا يعني انها خلاص بتاكل حقوق الناس .
اتطرق للنقطة التانية طبعا بعد احداث امبارح الدنيا بجد مش مستقرة بعد كلمة "نعم" للاستقرار يعني بجد لا استقرار ولا مادة تانية يعني منتهى الغباوة انهم اقنعوا الناس باللي حيحصل استقرار ودولة اسلامية "وياريتها حتبقى اسلامية صح غير اللي عاوزها اسلامية بتاع مصلحته" وبالتالي الاخوان اضربوا ضربة محترمة وافضل اعرفها بخازوق المهم واضح بردو ان الثورة المضادة شغالة صح حريق الداخلية وانضمام فصيل السلف والاخوة الاعداء والوطني وامن الدولة معا ضد ثورة الشعب اهم حاجة بس نكون مفتحين ورجاله كلنا مع بعض مسلم مسيحي بهائي المهم مصريين ايد واحدة كلنا عشان الثورة المضادة متفرقناش من بعض احنا محتاجين بعض اليومين دول بجد جدا واهم حاجة اننا منسكتش اللي يشوف فساد يفضح وينشر ويجرس واهم من ده كله الناس تبدا تنزل توعي الناس لو كل يوم 3 مثلا لحد 5شهور للانتخابات البرلمان يبقى كويس جدا جدا واهم حاجة مجلس الشعب يجي ممثل لكل الناس والطوائف عشان صوتنا يوصل وانا بقول اهو مش حينفع المجلس يبقى حزبين ولا 3 لا المجلس يبقى هو الشعب عشان هو اللي حيحط الدستور عشان كده هي ده العتبة اللي مصر كلها حتعديها لو الثورة المضادة غصب عنها وقفت ادامنا لو دستورنا الجديد كان محترم يبقى كده احنا قطعنا نص الطريق وارجع وافكر الناس الثورة المضادة شغالة بسرعة جدا والجيش والشرطة تقريبا لا لحقوا الثورة العادية ولا المضادة لازم احنا نقف ليها لان المبدا بيقول صاحب الحاجة بيحميها واحنا اصحاب الثورة ومحدش يحميها غيرنا لا ائتلاف الزفت بتاع الثورة اللي عايشين في ميه البطيخ ولا الجيش اللي هو جزء من نظام مبارك اما بالنسبة للوضع القادم انا بقلكم التفاؤل فرض اه فرض هي جت عليا اشمعنا السلف يفرضوا اللي عاوزينه وانا مفرضش بس اهم حاجة ابوس رجليكوا خليكوا صاحيين متناموش الثورة مخلصتش ويلا سلام!!!!
No comments:
Post a Comment