هو مين ثورة ومين ثورة مضادة؟؟!!

حبتدي كلامي وانا بقولوكم ان الشرعية للثورة وليس لاحد ان يفرض نفسه عليها حتى لو كان حاميها او من كان فيها وكلكوا عارفين قصدي ايه يعني ايه عصام شرف يلطع علينا بقرار يقمع التظاهر ويقول انن حندفع نص مليون جنيه لو اتمسكنا يعني رد بسيط هو لو المواطن معاه نص مبلغ التهمة ده كان حينزل مثلا؟؟!!

هو مش عصام شرف جه من التحرير؟؟ هو مش عصام شرف نزل معانا؟؟ هو مش الجيش وعد حفظ حق التظاهر الحر وعدم قمعه؟؟ امال في ايه هي الثورة من امتى بتتقمع بقوانين؟؟ ومن امتى الجيش بيصدر قوانين تقمع الثورة اللي هو بيحميها؟؟ من امتى الجيش بينتهك حرمة الجامعات ويضرب الاساتذة والطلبة ويحمي رموز النظام على حساب اصحاب الثورة؟؟ لو فرضنا ان الجي طرف محايد مش كان يقعد دول و دول ونتفاهم؟؟

شوفوا بجد ده مش شكل جيش حامي للثورة مع احترامي لما قالوه!!

من الاخر اللي بيحصل اليومين اللي فاتوا من تصرفات مشينة للجيش في حق المتظاهرات من اختبارات عذرية قصرية لهم وانه يقول للمعتقلين ارفع راسك فوق انت مصري ويروح يضربهم بالبيادة(جزمة الجيش) اللي هو جيش مصر جيش الشعب في وشهم ما علينا ده كوم واللي بيعمله استاذ عصام شرف للاسف مخزي في حقه وحق الثورة وحق كلامه اللي قال انا جيت عشان الثورة واحقق مطالبها ولو معرفتش حرجع التحرير تاني معاكم ازاي وانت عاوز تمشينا من التحرير وتحبسنا معلش ممكن تكون نسيت وانا حفكرك نسيت ان لسة ابضايات النظام بيبرطعوا هنا وهناك ومخططات تصفية وبلطجة وتهديد وانتهاكات وقتل ثوار في ميدان التحرير اللي انت كنت فيه كل دول سبتهم وقررت انك تحميهم من قانون الطوارئ وتيجي على الشباب اللي فتح صدره للرصاص واتكلم بحرية تقمعهم بقانون الطوارئ وتقمع العمال اللي انا بقولك اهو مطالبهم مش فئوية من امتى مطالبهم كانت فئوية هو لما الواحد منهم يصوت ويقولوا الحقوا هنا حرامي فاسد يبقى مطلب فئوي ولا مطلب وطني بيحط حياته وشغله واكل عيشه في جهنم عشان يشاور على واحد ظالم بيدمر مصر معلش يا عصام شرف انت تقريبا خذلت الثورة اللي خلتك تنزل تتكلم بحرية واما جيت تحميها عاوز تكتمها وانا بقولك لا انت ولا طنطاوي ولا حد اتخلق ان شاء الله يقدر يخمدها واذا وقفت ضدها مع النظام اللي فات وفي نفس صف الجيش الشعب مش بيسيب ولا بينسى وافتكر التحرير مش بعيد!!! واحنا في انتظارك لاخر لحظة يا شرف الحق تعالى انزل معانا عشان مننزلش مليونية عشانك.

اما بالنسبة لموضوعي اللي ممكن يبقى غريب شوية احنا كلنا عارفين ان الثورة المضادة بتحاول تخمد الثورة بالبلطجة والطائفية عشان نعد في البيت ونسكت طيب اما الجيش يوافق على قرار يحبس الحرية والثوار ويكتمنا وكذلك معاه شرف وقبله العادلي اللي عمل ومفذ القرارات ده من الكلب حسني يبقى ايه اتغير؟؟؟ غيرنا حسني بطنطاوي؟ شرف بنظيف؟ عادلي بحمدي بدين بتاع الشرطة العسكرية؟ مش فاهم الثورة قامت على النظام ككل مش عشان نشيل حسني نجيب مكانه 5 تانين؟

طيب دلوقتي لما الوضع احتدم الناس اهية حتنزل يوم الجمعه عشان تندد بموقف المجلس الاعللى من التعذيب والتعنت ملاحقة المتظاهرين عسكريا وترك القاتلين مطلوقين زي صفوت الشريف وعزمي وسرور شوفوا الفيديو المستفز ده وقولوا انتوا

من الاخر انا بضم صوتي مع صوت د/نادر الفرجاني في رسالته المفتوحة للحكومة ككل بما فيها شرف والمجلس الاعلى للقوات المسلحة في مقاله الرائع د. نادر الفرجاني يكتب: بإقامة العدل.. وليس بتجريم الحقوق.. تهدأ الاحتجاجات بجد هي ده طريقة حل النزاع ده لو توفرت الارادة اللي هي مش موجودة للاسف عشان كده رصيد الجيش بينفذ والشعب مازال غاضب ونحن لانريد ان ياتي اليوم اللي نقول فيه محدش معانا والثورة تنزل ويحصل شئ مش لطيف لاقدر الله عشان كده الجيش لازم يعيد حساباته لان محدش عبيط كلنا عارفين ان الجيش متورط في فساد ويسيطر على 25% من اقتصاد مصر وده من نص كلام الدكتور جوشوا ستاكر، استاذ العلوم السياسية في جامعة ولاية كينت والذي يدرس الجيش المصري "أن الجيش يتحكم في 33 في المئة الى 45 في المئة من الاقتصاد المصري"، وفي مناخ من الفساد المرعب لا يعرف أحد حقا حقيقة حجم أصول المؤسسة العسكرية وممتلكاتها الصناعية حيث إن هذه أمور "خارج الميزانية" ! ولكن وفقا لمعظم المحللين والكتابات التي ظهرت مؤخرا فأن الجيش المصري يسيطر علي أقل التقديرات علي 25 في المئة من الاقتصاد المصري الذى تعدى حجمه التريليون جنيه وفقا للبيانات الرسمية، أي أن الجيش وفقا لهذا الرقم يسيطر علي الأقل علي أصول اقتصادية تتراواح قيمتها ما بين 250 مليار جنيه و450 مليار جنيه، هذه الأصول تدر ارباح تقدر بعشرات المليارات من الجنيهات سنويا، معظم هذه الأرباح تكدست في جيوب مبارك وقادته العسكريين، وهي لا تظهر للمصريين حتى في حدها الأدنى، فضلا عن حصول كبار القيادات على العديد من العقارات الفخمة والاستيلاء علي الأراضي والمناجم بعد التقاعد.

واللي عاوز يقرا المقال كله بتاع المجلس العسكري يقود الثورة المضادة بقلم ابراهيم الصحاري.

فبلتالي الجيش مازال يحمي فساد سواء فساد الكبار السابقين او فساده ولازم يفهم الشعب مش عبيط وصاحي لكل حاجة واهم حاجة دلوقتي الصراحة والشفافية والا الناس حتبدا تحط الف خط على سؤال بسيط "ليه الجيش ميعملش زي تونس؟!" وده حيبقى جوهر الثورة القادم ارجو من المشير ان يعيد حساباته قبل فوات الوقت لان الثورة لم تحسم موقفها من انها ثورة بيضاء او دموية وكل الاحتمالات مفتوحة وذمة البلد في ايد القيادات ومحدش حيرحمهم لو حصل مالايحمد عقباه!!!