قراءة لاحداث الثورة !!؟

لماذا كل هذا الغموض في موقف الجيش الذي لا يترك لنا محل للنوايا الحسنة اتجاه الجيش لكن مع ذلك فهو جيش مصر الذي دخل حرب 73 وانتصر فيها وعاد لنا
بنصر عظيم نشكره على اثره وكذلك انحاز لارادة الشعب ونحى الرئيس محمد حسني مبارك وحمى المصريين ولكن؟!؟

لو سمحتوا متتسرعوش وتحكموا عليا اني بشوه الجيش او بحاول ادمر صورته لا انا بس احب اقول للجيش ان مصر تريد جيشها اسمى من الذي يحدث
حيث يكون جيش الشعب المخلص الذي يريده شعب مصر فهو درعنا وهو مصد للاخطار

انا كتبت المقالة ده عشان الاساله اللي بتدور في راسي وانا كتبتها بعد ما فضلت افكر اكتر من 48 ساعة متواصلة مع بعض عشان بس احاول اجيب تفسير منطقي للي بيحصل
مثلا نبدا من قبل تنحي الرئيس مبارك وناخد الحاجات نقطة نقطة:

1-لما الجيش كان موجود خلال معركة الجمل وبعدها لم توجد او توجه اوامر للوحدات للتدخل وده كان باين لما شفنا الجنود قاعدين على الدبابات واول ما هجموا البلطجية
الجيش دخل الدبابات ولم يتدخل الا لحد تاني يوم الصبح وفي خضم اللي بيحصل كانت الشرطة العسكرية تعتقل وتاخد الكاميرات وتداهم مراكز حقوقية
واعتقلت حقوقين ومدراء مؤسسات حقوقية

2-عندما انتهت ازمة تنحي الرئيس مبارك بخلعه على يد جيشنا العزيز ماذا حدث ؟؟ ابتدينا نشوف وجه الجيش القاسي الى حد ما بحيث شفنا اشتباكات خفيفة
وكانت الصراحة منطقية في وقتها عشان نبتدي نفض الاعتصام وحصل ما حصل ولم نقف عليه والجيش كان محافظ على اعصابه لكن في يوم اربعاء دامي
هجم الجيش على ميدان التحرير بليل بصواعق وضرب وسحل واعتقالات للمتظاهرين على ايد الشرطة العسكرية ولم تظهر اي فيديوهات او دلائل على تعذيب
او اي شئ وصدر اعتذار للشعب وشكرنا الجيش لان رصيده "لم ينفذ عندنا عند هذه المرحلة" وتقبلنا الاعتذار وطوينا الصفحة

3-بعد اللي حصل ده باسبوع تقريبا هجم الجيش تاني تقريبا مع ناس بلبس مدني وشكلهم تقريبا بلطجية وفي اليوم ده الجيش اعتقل مايزيد عن 150 شخص ومنهم بنات
وهنا كانت الصدمة حيث قامت الشرطة العسكرية بضرب المتظاهرين في المتحف المصري وضربهم باسلوب وحشي جدا وكان امن الدولة اتحل وارفق بوزارة السياحة
فرع المتحف المصري وده مش بس كده ده وصل لعمليات كشف عن عذرية بنات وتصوريهم وهم عرايا خلال الكشف عن عذريتهم المشكلة الاكبر ان الحقائق اللي كشف عنها
الممثل علي صبحي كانت صادمة بجد وموحشة وصلت لان قيادات من الجيش تامر المتظاهرين على الارض برفع رؤسهم لانهم مصريين "ارفع راسك فوق انت مصري" ولما يرفع راسه
يركل الظباط وجه المتظاهرين ويصفعوهم انا اول مرة بجد اشعر بشعور غريب جدا اني وقعت في بلد تانية مع العلم ان الاسرى الاسرائيلين لم يعذبوا او ينكل بهم
لان الجيش المصري عقيدته سوية وليست عقيدة منحرفة لكن اللي بسمعه ده غريب جدا ومع العلم والتوضيح ان مازال هناك اكثر من 200 معتقل في السجون العسكرية وكلهم اعتقلوا بعد تنحي مبارك وكان برضو منهم
الفنان رامي عصام اللي تم تشويه جسده من الضرب بالعصيان

4-وامبارح قام الجيش المصري باعتقال مذيعين في التلفزيون المصري كانوا معتصمين عشان تطهير قيادات التلفزيون المصري اللي لسة لحد دلوقتي محدش
بص ليهم وقيادات الجامعات والمجالس المحلية مع وعود متكررة باتخاذ قرارات في هذه الشؤون

5-نيجي لموضوع الاستفتاء المثير للجدل بجد دلوقتي انا معرفش الانقسام الغريب اللي في الشارع المصري ده ايه سببه اذا كنا في الاول وافقنا على دستور جديد
لكن موقف الاسلاميين من جماعات وسلف كان غريب جدا قبل الاستفتاء باسبوع قالوا انهم موافقين وابتدوا يطلعوا على قنوات التلفزيون الاخواني اسف المصري
وحاجة غريبة جدا عبود الزمر القاتل لاحسن رئيس مصري "من وجهة نظري" اصبح ايقونة ؟؟؟ طيب خيرت الشاطر ماشي لكن عبود؟وحيرشح نفسه كمان
احيه وحيعمل حزب يلاهوي ايه ده مصر على فين "امارة اسلامية" يا ساتر يا رب المهم ندخل بقا في صلب الموضوع مما لاشك فيه ان الاخوان وافقوا في اخر لحظة
لعلة ما والاوخوان معروفين لا يولفقوا على حاجة الا ووراها مصلحة زي ما وافقوا على الحوار مع سليمان في حين تاكيدهم على مطالب الشعب ثم عودتهم للشارع
تاني لما شافوها مش جايبة تمنها ثم عادوا لينشقوا ويقولوا نعم وقصدت هنا انهم ينشقوا عن الثورة مش الاسلام "انا مش بخون زي حد تاني ولا بكفر" المهم
بغض النظر عن استعمال الدين وشعارات دينية غريبة في كل جامع وكل مكان في مصر وصمت الجيش الغريب يدل على مساحة من الحريات اخدوها الاخوة الاخوان
والسلف تنص على استعمال شعارات دينية لاغراض سياسية "طبعا حرام" المهم الجيش فضل ساكت ومهمش موقفه في الاستفتاء وسكت على الانتهاكات الفادحة
هو مش قال انه حيقبض على اي تجمع امام اللجان وده محصلش ومتهيالي كل اللي راح يستفتي قلبه عارف قصدي كويس وشاف اللي كل المصريين شافوه
تجمعات تحرم لا وتحلل اه ما علينا برضو نيجي للنقطة المهمة بعد اللي حصل في الاستفاء اولا انا مش منجم ولا بشوف الكف عشان اعرف ان الاخوان والسلف
بعد الضجة الاعلامية واسبوع الاخوان على القنوات المصرية ناهيك عن السكوت عن الانتهاكات الفادحة انهم في حاجة حد عطهالهم او اخدوا اوكيه من مجلس عسكري
انهم ينزلوا وعليهم الامان ويعملوا حملة واسعة وميقلقوش المهم الجيش بتكتمه وصمته على شئ غلط قد يكون نابع من حاجتين اولهم انه ممكن يكون خايف او
متواطا بحكم معرفته للي حصل وسكوته وانا برجح الاخير لكن اللي يولع الدماغ صمته على الفلتان الامني في لجنة البرادعي وعلى انه قبض على 6 مراقبين للاستفتاء
وتركه تجمعات الاخوان والسلف امام اللجان في تحدي صريح لقانون منع التظاهر اما اللجان والتجمع امامها مع ان المراقبين كان معاهم تصاريح ما علينا برضو

6- نيجي عند النقطة المهمة وهي عبارة عن سؤال واحد اللي يجاوب عليه اديله جزرة علل ؟ ليه الجيش جه بعد الاستفتاء وقال حيعمل اعلان دستوري؟؟
هو مش الناس قالت نعم عشان نصبر على الدستور بحجة واهية وهي "الاستقرار" وابقوا قابلوني لو شفتوها طول منتو كده المهم والناس التانية قالت لا عشان الاعلان ده
وصرفنا فلوس وصورنا ورق ونزلنا واتشحططنا عشان كلمة لا وفي الاخر اللي قال نعم واللي تعب عشان يجيب كلمة لا لبسوا اكبر خازوق تاريخي الا وهو
اعلان دستوري ببساطة طب مكنت تقول من الاول يا ممدوح ما علينا يبقا مدام الجيش عارف ان النتيجة كده كده اعلان عمل استفتاء ليه من الاول؟؟ ده يخليني
اشكك في هدف الاستفتاء هل هو مجرد لعبة على الشعب لايهامه بالحرية او هي لعبة لتقسيم الشعب الثورجي بحيث يبقا كتلتين عكس بعض؟؟ او صفقة بين الجيش
والاخوان وباقي التيارات الاسلامية


7- انا حاخد نظرية الصفقة واشرحها دلوقتي الوقيعة بالفعل حصلت بين المعسكرين وما حصل حصل المهم ليه الوقيعة حصلت ؟؟ عشان ناس طلعت فجاءة وقالت نعم
وناس باقية عند كلمتها وقالت لا طيب ليه فجاءة الاخوان قالو نعم وحصل التحول الفجائي الغريب ده ؟؟ صفقة بكل بساطة والفقة بدات تتضح اركانها وياريت ابقى غلطنا وحد
يصلحلي ويفهمني لاني خلاص حتجنن بكل بساطة دلوقتي الجيش مسيطر على الحكم بس مش على الشارع يعني ناقصه اداة مهمة جدا لو عاوز يركب الحكم الشعب
وخلاص اهو حصل عليه للاسف ملايين من الاخوة على الاقل 14مليون منهم 5 اخوان والباقي صدق حججهم الواهية وادينا شفنا بعينا نتائج الاستفتاء "المشكوك في صحتها" المهم
انا اتصدمت امبارح لما سمعت عن محمد علي بلال اللواء السابق المرشح للرئاسة وهنا كملت النظرية وياخوفي تكون بقت واقعية المهم كده انا ربطت ده بده حيث
ان الجيش حيرشح لواء متقاعد من ايام النظام السابق ويحوز على اصوات الاخوان ومن تبعهم مقابل حصول الاخوان على عدد محترم من مقاعد البرلمان
المهم السؤال التاني اللي ياكد كلامي هما الاخوان عاجزين عن ترشيح رئيس؟ لا طبعا عندهم ناس بالهبل من الوزير للغفير يعني 30 سنة تنظيم يعني تفوق كاسح
ما علينا طيب ليه الاخوان مش حيرشحوا رئيس اللي خلاهم عملوا الحرام واستغلوا الدين في السياسة جت على الحلال المرتقب منذ 30 سنة ؟؟؟ صدموني
الصراحة المهم بعد كل ده مازال هذا راي  الشخصي العجيب والله اعلم ورسوله


اخيرا عشان مطولش عليكم انا بس حبيت اقولكم ان ده اول كتاباتي في حياتي وارجو ان اكون واقعي مش مبتذل وشكرا بس خدوا مبدا من هنا لحد الثورة ما تخلص اللي بيحمي الثورة اصحابها مش حد تاني